یومِ آزادی پاکستانی عوام کی جرأت، عزم، مضبوط جذبے کی عکاسی کرتا ہے: روس

پاکستان میں روس کے سفیر البرٹ پی خوروف نے پاکستان کے یومِ آزادی کے پرمسرت موقع پر پاکستانی عوام کو دلی مبارکباد پیش کرتے ہوئے دونوں ممالک کے درمیان دوستانہ، قریبی اور باہمی احترام پر مبنی تعلقات کو اجاگر کیا ہے۔ اپنے ایک خصوصی تہنیتی پیغام میں روسی سفیر نے کہا کہ پاکستان کا یومِ آزادی یہاں کے لوگوں کی “جرأت، عزم اور مضبوط جذبے” کا آئینہ دار ہے۔ انہوں نے اس بات کا اعتراف کیا کہ پاکستان نے گزشتہ کئی دہائیوں کے دوران اپنے بانیانِ وطن کے نظریات اور امنگوں کی روشنی میں ترقی کا ایک الگ اور بہترین راستہ اختیار کیا ہے۔

روسی سفیر البرٹ پی خوروف نے پاکستان اور روس کے درمیان دیرینہ تعمیری تعاون کا ذکر کرتے ہوئے اس عزم اور اعتماد کا اظہار کیا کہ دونوں ممالک اپنے عوام کے وسیع تر مفاد میں باہمی مفاہمت کو مزید تقویت دیں گے اور متعدد شعبوں میں شراکت داری کو وسعت دینے کا سلسلہ جاری رکھیں گے۔ انہوں نے یومِ آزادی کو قومی فخر، خوشی اور جشن کا موقع قرار دیتے ہوئے امید ظاہر کی کہ پاکستان میں امن، استحکام اور خوشحالی کا دور ہمیش قائم رہے گا۔ اپنے پیغام کے اختتام پر انہوں نے پاکستانی عوام کی صحت، کامیابی اور ترقی کے لیے نیک تمناؤں کا اظہار کیا اور “پاکستان زندہ باد! روس پاک دوستی پائندہ باد!” کا نعرہ بھی لگایا۔