حکومت اور منی مزدا گڈز ٹرانسپورٹرز کے درمیان معاملات طے پاگئے، ہڑتال ختم

ملک بھر میں گڈز ٹرانسپورٹرز کی مسلسل 6 روز سے جاری ہڑتال حکومت اور آل پاکستان منی مزدا گڈز ٹرانسپورٹرز ایسوسی ایشن کے درمیان مذاکرات کی کامیابی کے بعد ختم کر دی گئی ہے۔ ایسوسی ایشن کے صدر حاجی شیر علی نے ہڑتال ختم کرنے کا باقاعدہ اعلان کرتے ہوئے بتایا کہ گزشتہ 4 دنوں سے حکومت کے ساتھ مسلسل مذاکرات جاری تھے، جس کے نتیجے میں ٹرانسپورٹرز کے تمام جائز مطالبات منظور کر لیے گئے ہیں۔ انہوں نے وضاحت کی کہ مزدا گاڑیوں کے ایکسل ویٹ (وزن)، موٹرویز پر جانوروں کی منتقلی اور کسٹمز سے متعلق درپیش مسائل کو حل کر لیا گیا ہے۔ حاجی شیر علی نے مزید کہا کہ باقی ماندہ مطالبات کے لیے حکومت نے ایک کمیٹی تشکیل دینے کی یقین دہانی کرائی ہے، جس کے بعد ملک بھر میں ٹرانسپورٹ سرگرمیاں بحال کر دی گئی ہیں