اقوام متحدہ اور ایف پی سی سی آئی کا کاروباری برادری کو انسانی امدادی اقدامات سے جوڑنے پر اتفاق

صدر فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) عاطف اکرام شیخ سے پاکستان میں اقوام متحدہ کے ریذیڈنٹ کوآرڈینیٹر محمد یحییٰ نے ملاقات کی، جس میں انسانی امداد، بحرانوں سے نمٹنے اور نجی شعبے کے متحرک کردار پر تفصیلی گفتگو کی گئی۔ ملاقات کے دوران دونوں رہنماؤں نے اقوام متحدہ اور پاکستان کی بزنس کمیونٹی کے درمیان پبلک پرائیویٹ پارٹنرشپ کو مزید مضبوط بنانے پر اتفاق کیا۔ صدر ایف پی سی سی آئی نے اقوام متحدہ کے کردار کو سراہتے ہوئے کہا کہ بحرانوں کے مؤثر حل کے لیے نجی شعبے کی شمولیت انتہائی ضروری ہے اور پاکستانی کاروباری برادری اس سلسلے میں اپنا بھرپور کردار ادا کر رہی ہے۔ یو این ریذیڈنٹ کوآرڈینیٹر محمد یحییٰ نے بھی پاک بزنس کمیونٹی کی صلاحیتوں پر اعتماد کا اظہار کرتے ہوئے کہا کہ اقوام متحدہ پاکستان میں رزیلینس اور فوری امدادی کاموں کے لیے ایف پی سی سی آئی کے ساتھ مل کر کام کرتی رہے گی۔