پنجاب حکومت کا انتظامی اخراجات کم کرنے کیلئے 101 آسامیاں ختم کرنے کا فیصلہ

پنجاب حکومت نے انتظامی اخراجات میں کمی اور محکموں کی تنظیمِ نو کے تحت جنوبی پنجاب سیکرٹریٹ اور مرکزی صوبائی محکموں میں مختلف گریڈز کی 101 آسامیاں ختم کرنے کی منظوری دے دی ہے۔ حکومت کی منظوری کے بعد ایڈیشنل چیف سیکرٹری پنجاب کی جانب سے اس فیصلے کا باقاعدہ نوٹیفکیشن جاری کر دیا گیا ہے، جس کا اطلاق محکمہ خزانہ کے 31 جولائی 2026ء کے فیصلے کی روشنی میں کیا گیا ہے۔

نوٹیفکیشن کے مطابق صوبے کے مرکزی انتظامی محکموں میں اسکول ایجوکیشن ڈیپارٹمنٹ کی سب سے زیادہ 6 آسامیاں ختم کی گئی ہیں، جبکہ محکمہ خزانہ، داخلہ، صحت اور اسپیشلائزڈ ہیلتھ کیئر کی 5، 5 آسامیاں ختم کی گئی ہیں۔ اس کے علاوہ وزیراعلیٰ آفس اور لوکل گورنمنٹ کی 3، 3 جبکہ زرعی، مواصلات، توانائی، ایکسائز اور دیگر محکموں کی 2، 2 آسامیاں ختم کر دی گئی ہیں۔

جنوبی پنجاب سیکرٹریٹ میں بھی سیکشن افسران کی متعدد اسامیوں کا خاتمہ کیا گیا ہے، جن میں ہیلتھ اینڈ پاپولیشن ڈیپارٹمنٹ کی سب سے زیادہ 8، فنانس، ہائر ایجوکیشن اور اسکول ایجوکیشن کی 4، 4، جبکہ آبپاشی و لوکل گورنمنٹ کی 3، 3 آسامیاں شامل ہیں۔ حکومت کی جانب سے متعلقہ تمام محکموں کو فیصلہ سے آگاہ کرتے ہوئے مزید انتظامی کارروائی فوری مکمل کرنے کی ہدایات جاری کر دی گئی ہیں۔