اسرائیلی فورسز جنوبی لبنان میں گھروں کو تباہ اور نذرِ آتش کر رہی ہے: لبنانی میڈیا

جنوبی لبنان میں حالات کشیدہ ہیں جہاں سرکاری خبر رساں ایجنسی کے مطابق اسرائیلی فورسز نے سرحدی قصبوں مجدل زون، منصوری اور ان سے ملحقہ وادیوں میں واقع رہائشی مکانات کو دھماکوں سے تباہ کرنے اور نذرِ آتش کرنے کی کارروائیاں کی ہیں۔ اطلاعات کے مطابق اسرائیلی جنگی طیاروں نے منصوری کے علاقے پر دو شدید فضائی حملے کیے جبکہ ساحلی شہر صور سے بھی زور دار دھماکوں کی آوازیں سنی گئی ہیں۔ واضح رہے کہ گزشتہ ہفتے اسرائیلی فوج کی جانب سے منصوری کے رہائشیوں کو علاقہ خالی کرنے کا جبری حکم جاری کیا گیا تھا۔

اسرائیلی وزیرِ دفاع نے اپنے حالیہ دورۂ جنوب میں فورسز کی موجودگی کو ضروری قرار دیتے ہوئے خطے میں بنیادی ڈھانچے اور مکانات کی مسماری کے عمل کا دفاع کیا ہے۔ اس کے برعکس لبنانی قیادت اور حکومت نے مکانات کی منظم اور وسیع پیمانے پر تباہی کو بین الاقوامی قوانین اور انسانی حقوق کی کھلی خلاف ورزی قرار دیتے ہوئے شدید مذمت کی ہے۔ دوسری جانب امریکی محکمۂ خارجہ نے لبنانی علاقائی سالمیت کی حمایت کا اعادہ کرتے ہوئے امید ظاہر کی ہے کہ اسرائیل امریکی ثالثی میں طے پانے والے انخلا کے معاہدے کی مکمل پاسداری کرے گا۔