چین کے مقامی ساختہ C919 طیارے کی پہلی بین الاقوامی پرواز مکمل

چین کے مقامی طور پر تیار کردہ بڑے مسافر طیارے C919 نے اپنی پہلی بین الاقوامی تجارتی پرواز کامیابی سے مکمل کرتے ہوئے منگولیا کے دارالحکومت اولان باتر میں بحفاظت لینڈنگ کی۔ عالمی میڈیا کی رپورٹ کے مطابق، بیجنگ سے روانہ ہونے والی اس پرواز کی اولان باتر آمد کے ساتھ ہی C919 کے لیے پہلے بین الاقوامی تجارتی فضائی روٹ کا باقاعدہ آغاز ہو گیا ہے، جسے چینی طیارہ سازی کی صنعت میں ایک تاریخی پیش رفت قرار دیا جا رہا ہے۔ کمرشل ایئر کرافٹ کارپوریشن آف چائنا (COMAC) کا تیار کردہ یہ دو انجن والا طیارہ 156 سے 192 مسافروں کی گنجائش رکھتا ہے اور ایک بار ایندھن بھرنے پر 4,000 سے 5,500 کلومیٹر تک پرواز کر سکتا ہے جبکہ یہ 20,400 کلوگرام تک وزن اٹھانے کی صلاحیت رکھتا ہے۔