پاسداران انقلاب کو دشمن کی سرزمین پر حملوں کی صلاحیت حاصل کرنے کا حکم

نئے فوجی ڈاکٹرائن کے تحت ایران کی اسلامک ریولوشنری گارڈ کور (پاسدارانِ انقلاب) کو دشمن کی سرزمین پر حملے کرنے کی صلاحیت حاصل کرنے کی ہدایات جاری کر دی گئی ہیں۔ پاسدارانِ انقلاب کے سینئر مشیر بریگیڈیئر جنرل رضا نقدی نے اپنے ایک بیان میں بتایا کہ فورس کو حکم دیا گیا ہے کہ وہ اپنی آپریشنل اور جنگی صلاحیتوں میں اس حد تک اضافہ کرے کہ ضرورت پڑنے پر اپنی سرحدوں سے باہر دشمن کے علاقے تک جا کر جارحانہ کارروائیاں کی جا سکیں۔ انہوں نے مزید کہا کہ اگرچہ امریکا کا دفاعی و جنگی بجٹ ایران سے 100 گنا زیادہ ہے، اس کے باوجود دشمن کے 14 اہم ترین مقاصد کو ناکامی سے دوچار کیا گیا ہے۔ بریگیڈیئر جنرل نقدی کے مطابق، ایران کی نئی دفاعی حکمتِ عملی کا مقصد جنگ کو دشمن کے اپنے علاقے میں منتقل کرنا ہے اور فورسز کو اس قابل بنایا جا رہا ہے کہ وہ وقت آنے پر اس آپریشنل صلاحیت کو عمل میں لا سکیں۔