آسٹریا: روسی دفاعی صنعت کو سامان کی فراہمی پر 2 بیلا روسی شہریوں کو سزا سنا دی گئی

آسٹریا کی ایک عدالت نے عالمی برآمدی پابندیوں کی سنگین خلاف ورزی کا مجرم قرار دیتے ہوئے دو بیلا روسی شہریوں کو سزا سنا دی ہے۔ عالمی خبر رساں ایجنسی کے مطابق دونوں ملزمان پر روسی کمپنیوں کو ایسا حساس صنعتی سامان اور مشینیں فراہم کرنے کا الزام ثابت ہوا ہے جسے آسٹریا کی حکومت کے مطابق میزائلوں اور جنگی لڑاکا طیاروں کے انجن سمیت مختلف فوجی سازوسامان کی تیاری میں استعمال کیا جاتا تھا۔

تحقیقات اور استغاثہ کی دستاویزات کے مطابق کیس کا مرکزی ملزم 28 سالہ شخص تھا، جو ویانا میں قائم ایک تجارتی کمپنی کا ڈائریکٹر تھا۔ اس نے تیسرے ممالک میں قائم متعدد جعلی یا کاغذی (شیل) کمپنیوں کے ایک بڑے نیٹ ورک اور جعلی ‘اینڈ یوزر سرٹیفکیٹس’ کا سہارا لیتے ہوئے روس کو خصوصاً دھاتی کام کے لیے استعمال ہونے والے آلات اور مشینیں بھیجیں۔ کیس میں نامزد دوسری ملزمہ 24 سالہ خاتون تھی، جو اس کمپنی میں شراکت دار ہونے کے ساتھ ساتھ تمام مالیاتی حساب کتاب دیکھتی تھی۔

عدالتی کارروائی کے دوران دونوں ملزمان نے اپنے جرائم کا اعتراف کر لیا۔ عدالت نے مرکزی ملزم کو 21 ماہ قید کی سزا سنائی، تاہم اس میں سے 19 ماہ کی سزا معطل کر دی گئی۔ چونکہ وہ رواں سال مئی سے ہی حراست میں تھا، اس لیے عدالت نے فیصلہ سناتے ہوئے اسے فوری طور پر رہا کرنے کا حکم دیا۔ دوسری جانب خاتون ملزمہ کو 15 ماہ کی معطل شدہ سزا سنائی گئی۔ دونوں ملزمان نے عدالت کے اس فیصلے کو قبول کرتے ہوئے اعلیٰ عدلیہ میں اپیل نہ کرنے کا فیصلہ کیا ہے۔