عراق نے اکتوبر تک غیر ملکی فوجیوں کی موجودگی ختم کرنےکا عزم ظاہر کر دیا

عراقی وزیراعظم علی فالح الزیدی نے عزم ظاہر کیا ہے کہ رواں سال یکم اکتوبر تک عراق کی سرزمین پر کسی بھی غیر ملکی فوجی کی موجودگی نہیں رہے گی اور ملک کے تمام تر ہتھیار بلا استثناء صرف اور صرف ریاست کے کنٹرول میں ہوں گے۔ عرب میڈیا کے مطابق عراقی قیادت اپنے ملکی دفاع اور سلامتی کے فیصلے خود کرنے کے لیے مکمل طور پر تیار ہے۔

عراقی وزیراعظم کے دفتر سے جاری کردہ سرکاری بیان کے مطابق امریکی سینٹرل کمانڈ (سینٹکام) کے کمانڈر جنرل چارلس بریڈ کوپر سے ملاقات کے دوران عراقی وزیراعظم نے طے شدہ معاہدے اور اس کی مقررہ مدت کی پابندی کے عزم کا اعادہ کیا۔ انہوں نے واضح کیا کہ معاہدے کے تحت عراق میں قائم بین الاقوامی اتحاد کے فوجی مشن اور اس سے وابستہ تمام غیر ملکی افواج کا انخلا 30 ستمبر تک ہر صورت مکمل کر لیا جائے گا۔

بیان میں مزید کہا گیا ہے کہ یکم اکتوبر کا دن عراقی ریاست کی تاریخ میں ایک بالکل نئے دور کا آغاز ثابت ہوگا، کیونکہ اس تاریخی دن کے بعد عراق کسی بھی غیر ملکی فوجی موجودگی اور مداخلت سے مکمل آزاد ہو جائے گا۔ اس کے بعد ملک کی سیکیورٹی، سلامتی اور اندرونی و بیرونی استحکام برقرار رکھنے کی تمام تر ذمہ داری عراق کی اپنی قومی افواج سنبھالیں گی۔