وزیر خارجہ اسحاق ڈار کی زیر صدارت اجلاس، آئندہ سفارتی سرگرمیوں کا جائزہ

نائب وزیراعظم و وزیر خارجہ سینیٹر محمد اسحاق ڈار کی زیر صدارت وزارت خارجہ میں ایک اعلیٰ سطح کا اجلاس منعقد ہوا جس میں ملک کی آئندہ سفارتی سرگرمیوں، دوطرفہ تعلقات اور عالمی و علاقائی صورتحال کا تفصیلی جائزہ لیا گیا۔ ترجمان دفتر خارجہ کے مطابق اجلاس میں آنے والے دنوں میں متوقع اعلیٰ سطح کے غیر ملکی دوروں کی تیاریوں پر غور کیا گیا، جن میں ناروے کے وزیر خارجہ کا اسلام آباد کا اہم دورہ بھی شامل ہے۔

اجلاس کے دوران نائب وزیراعظم اسحاق ڈار نے ہدایت کی کہ پاکستان کی سفارتی سرگرمیوں کو زیادہ مؤثر اور جامع انداز میں آگے بڑھایا جائے تاکہ ملک کے لیے بہترین اور خاطر خواہ نتائج کو یقینی بنایا جا سکے۔ انہوں نے اس بات پر زور دیا کہ بین الاقوامی سطح پر مثبت نتائج کے حصول کے لیے وزارت خارجہ اور متعلقہ اداروں کے درمیان بہترین رابطہ کاری اور جامع تیاریاں بنیادی اہمیت کی حامل ہیں۔

اجلاس میں سیکرٹری خارجہ سفیر آمنہ بلوچ سمیت وزارتِ خارجہ کے دیگر اعلیٰ حکام نے شرکت کی۔ اس موقع پر پاکستان کے مختلف ممالک کے ساتھ دوطرفہ تعلقات کی موجودہ صورتحال اور علاقائی پیش رفت پر بھی حکمت عملی مرتب کی گئی۔