ایران نے امریکا کے ساتھ جنگ بندی میں توسیع پر مذاکرات کی تردید کردی

ایران نے امریکا کے ساتھ 60 روزہ جنگ بندی میں توسیع کے حوالے سے جاری مذاکرات کی اطلاعات کی باضابطہ تردید کرتے ہوئے واضح کیا ہے کہ جب جنگ بندی کی مدت باضابطہ طور پر شروع ہی نہیں ہوئی تو اس میں توسیع کا سوال پیدا ہی نہیں ہوتا۔ برطانوی خبر رساں ایجنسی ‘رائٹرز’ سے گفتگو کرتے ہوئے ایک سینئر ایرانی عہدیدار نے بتایا کہ تہران اور واشنگٹن کے درمیان جنگ بندی کو بڑھانے پر کوئی براہِ راست یا بالواسطہ بات چیت نہیں ہو رہی۔

ایرانی حکام کا کہنا ہے کہ امریکا نے عبوری معاہدے کے محض 48 گھنٹے بعد ہی اس کی خلاف ورزی کی اور کچھ عرصے بعد معاہدے سے خود کو الگ کر لیا تھا۔ اگرچہ ثالثوں کے ذریعے معاہدے کی بحالی اور تحریری وعدوں پر عملدرآمد کے لیے پیغامات کا تبادلہ ضرور ہو رہا ہے، لیکن مذاکرات میں فی الحال کوئی پیش رفت نہیں ہو سکی۔ اس سے قبل ترک ایجنسی انادولو نے پاکستانی ذرائع کے حوالے سے دعویٰ کیا تھا کہ دونوں فریقین 60 روزہ جنگ بندی بڑھانے پر متفق ہو چکے ہیں، تاہم ایران کی اس تازہ تردید کے بعد خطے میں کشیدگی کم ہونے کے امکانات ایک بار پھر غیر یقینی صورتحال کا شکار ہو گئے ہیں۔