امریکا کے ایرانی شرائط ماننے تک آبنائے ہرمز نہیں کھلے گی: محسن رضائی

ایرانی سپریم نیشنل سیکیورٹی کونسل کے رکن محسن رضائی نے واضح اعلان کیا ہے کہ جب تک امریکا ایران کی عائد کردہ شرائط تسلیم نہیں کرتا، تب تک آبنائے ہرمز کو بین الاقوامی آمدورفت کے لیے نہیں کھولا جائے گا۔ ان کا کہنا تھا کہ امریکا کو خطے میں جنگ کا خاتمہ کرنا ہوگا اور ایران کے منجمد فنڈز بحال کرنے ہوں گے، جبکہ دیگر شرائط بھی ثالثوں کے ذریعے واشنگٹن تک پہنچا دی گئی ہیں۔ انہوں نے مزید کہا کہ اگر ایران اور عمان کے درمیان تجارتی ٹرانزٹ سے متعلق کوئی الگ معاہدہ طے پاتا ہے تو وہ ایک الگ معاملہ ہوگا۔ دوسری جانب امریکی صدر ڈونلڈ ٹرمپ نے ایرانی رہنماؤں کو ‘چالاک مذاکرات کار’ قرار دیتے ہوئے کہا کہ امریکی انتظامیہ تہران کے ساتھ امن معاہدے کی کوششیں کر رہی ہے، تاہم ایرانی حکام کسی بات پر اتفاق کرنے کے بعد میڈیا کے سامنے اس سے مکر جاتے ہیں۔