ٹاؤن شپ واقعہ: دونوں خواتین پر تشدد ثابت نہیں ہوا: سی سی پی او لاہور

کیپیٹل سٹی پولیس آفیسر (سی سی پی او) لاہور بلال صدیق کمیانہ نے ڈی آئی جی آپریشنز فیصل کامران اور ڈی آئی جی انویسٹی گیشن ذیشان رضا کے ہمراہ پریس کانفرنس کرتے ہوئے بتایا ہے کہ ٹاؤن شپ واقعے میں ہلاک ہونے والی دونوں خواتین کی پوسٹ مارٹم رپورٹ میں کسی قسم کے تشدد کے شواہد سامنے نہیں آئے ہیں۔ سی سی پی او نے وضاحت کی کہ شناختی کارڈ نہ ہونے کے باعث پوسٹ مارٹم میں تاخیر ہوئی جس کی جوڈیشل مجسٹریٹ نے ضابطہ فوجداری کی دفعہ 176 کے تحت کارروائی کی۔ دوسری جانب غازی آباد تھانے میں معذور لڑکی سے مبینہ زیادتی کے معاملے پر بات کرتے ہوئے انہوں نے بتایا کہ سیف سٹیز کیمروں کی تمام ریکارڈنگز محفوظ کر کے فرانزک کے لیے بھجوا دی گئی ہیں اور ملوث اے ایس آئی عمران کو حراست میں لے لیا گیا ہے۔ انہوں نے واضح کیا کہ اس کیس میں ڈی آئی جی انویسٹی گیشن نے 78 اہلکاروں کو معطل کیا ہے اور ڈی این اے رپورٹ کا انتظار ہے، تاہم ملزم کو کسی قسم کی رعایت نہیں دی جائے گی۔