حکومت اور گڈز ٹرانسپورٹرز میں مذاکرات ناکام، ہڑتال جاری رکھنے کا اعلان

آل پاکستان گڈز ٹرانسپورٹ اونرز ایسوسی ایشن اور حکومت کے درمیان ہونے والے مذاکرات بغیر کسی حتمی نتیجے کے ختم ہو گئے ہیں، جس کے بعد ٹرانسپورٹرز نے اپنے مطالبات کی منظور تک ملک گیر ہڑتال جاری رکھنے کا اعلان کیا ہے۔ وفاقی وزیر مواصلات عبدالعلیم خان کے ساتھ ہونے والے اجلاس میں ٹرانسپورٹرز کے درپیش مسائل پر تفصیل سے گفتگو کی گئی اور سرکاری سطح پر مسائل حل کرنے کی یقین دہانی بھی کروائی گئی، تاہم گفتگو کسی باضابطہ معاہدے تک نہ پہنچ سکی۔ ایسوسی ایشن کے رہنما اویس چودھری نے واضح کیا کہ ٹرانسپورٹرز اپنے جائز اور قانونی مطالبات سے دستبردار نہیں ہوں گے، تاہم حکومت سے مزید گفتگو کے لیے راستے کھلے ہیں لیکن جب تک مطالبات پر عملی پیش رفت نہیں ہوتی، پہیہ جام ہڑتال قائم رہے گی۔