سعودی نئی فضائی کمپنی ریاض ایئر کا بنگلہ دیش کیلئے یومیہ پروازوں کا آغاز

سعودی عرب کی نئی قومی فضائی کمپنی ‘ریاض ایئر’ نے اپنے عالمی نیٹ ورک میں توسیع کرتے ہوئے بنگلہ دیش کے دارالحکومت ڈھاکہ کے لیے براہِ راست پروازوں کا باقاعدہ آغاز کر دیا ہے۔ ایئرلائن کے ترجمان کے مطابق ریاض کے کنگ خالد انٹرنیشنل ایئرپورٹ اور ڈھاکہ کے شاہ جلال انٹرنیشنل ایئرپورٹ کے درمیان یہ یومیہ سروس جدید ترین بوئنگ 9-787 ڈریم لائنر طیاروں کے ذریعے فراہم کی جائے گی۔

ریاض ایئر کی پہلی پرواز کے ڈھاکہ ایئرپورٹ پہنچنے پر طیارے کو روايتی ‘واٹر کینن’ کی سلامی دی گئی اور ایک پروقار تقریب کا اہتمام کیا گیا، جس میں سعودی عرب اور بنگلہ دیش کے ایوی ایشن حکام سمیت ایئرلائن کے سینئر عہدیداروں نے شرکت کی۔

ریاض ایئر نے اپنے ‘ایکس’ (سابقہ ٹوئٹر) اکاؤنٹ پر جاری بیان میں کہا کہ ڈھاکہ کے لیے روزانہ کی یہ سروس ایشیا میں ایئرلائن کے بڑھتے ہوئے عالمی نیٹ ورک کا ایک اہم حصہ ہے۔ واضح رہے کہ ایشیائی مارکیٹ میں قدم جما کر اپنی پروازیں شروع کرنے کے بعد ڈھاکہ ریاض ایئر کی نویں بین الاقوامی منزل بن گئی ہے۔