پاکستان میں آج اقلیتوں کا قومی دن منایا جارہا ہے

پاکستان بھر میں آج 11 اگست کو اقلیتی برادری کا قومی دن بھرپور عقیدت اور احترام کے ساتھ منایا جا رہا ہے۔ یہ دن ملکی تعمیر و ترقی میں غیر مسلم شہریوں کے مثبت اور اہم کردار کو سراہنے اور ان کے حقوق کے تحفظ کے اعادہ کا موقع فراہم کرتا ہے۔

11 اگست 1947 کو بانیٔ پاکستان قائد اعظم محمد علی جناح نے قانون ساز اسمبلی میں اپنے تاریخی خطاب کے دوران واضح کیا تھا کہ پاکستان میں تمام شہریوں کو بغیر کسی مذہبی تفریق کے مساوی حقوق اور مکمل مذہبی آزادی حاصل ہوگی۔ اسی بنیاد پر قائد اعظم کے ویژن کو اجاگر کرنے کے لیے حکومتِ پاکستان نے 2009 میں اس وقت کے وزیراعظم یوسف رضا گیلانی کے دور میں 11 اگست کو سرکاری سطح پر اقلیتوں کا قومی دن قرار دیا تھا۔

وطنِ عزیز میں مقیم مسیحی، ہندو، سکھ اور دیگر اقلیتی برادریاں ملک کی ترقی، سلامتی اور جشنِ آزادی کی تیاریوں میں بڑھ چڑھ کر حصہ لے رہی ہیں۔ ہندو اور سکھ برادری کا کہنا ہے کہ ہمسایہ ملک بھارت میں اقلیتوں پر ہونے والے مظالم کے برعکس پاکستان میں اقلیتیں مساوی حقوق اور مکمل آزادی کے ساتھ پرامن زندگی بسر کر رہی ہیں، جو ریاست کے بانی قائد اعظم کے عہد کی پاسداری کا منہ بولتا ثبوت ہے۔