ٹرمپ کا ایران سے جنگی نقصانات کا معاوضہ مانگنے کا اعلان

امریکی صدر ڈونلڈ ٹرمپ نے ایران کی جانب سے جنگی ہرجانے کے مطالبے کو سختی سے رد کرتے ہوئے جوابی دعویٰ کر دیا ہے کہ امریکہ، ایران سے امریکی شہریوں کی ہلاکتوں، دہشت گردانہ حملوں اور گزشتہ کئی دہائیوں کے جانی و مالی نقصانات کا مکمل معاوضہ طلب کرے گا۔

سوشل میڈیا پلیٹ فارم ‘ٹروتھ سوشل’ (Truth Social) پر جاری کیے گئے سلسلے وار بیانات میں امریکی صدر ڈونلڈ ٹرمپ نے انکشاف کیا کہ ایران کے حکام نے گزشتہ پانچ ماہ سے جاری عسکری کشیدگی میں ہونے والے نقصانات کے ازالے اور معاوضے کا مطالبہ امریکہ سے کیا ہے۔ ٹرمپ نے واضح کیا کہ ایران کے ساتھ تمام تر مذاکرات کے دوران جوہری ہتھیار نہ بنانے کی بنیادی شرط نافذ العمل رہی ہے، جبکہ ایران کے معاوضے کی بات چیت کا سابقہ کسی ملاقات یا گفتگو میں کوئی ذکر تک نہیں تھا۔

ڈونلڈ ٹرمپ نے ایرانی مطالبے کو زبردست جوابی حربے میں بدلتے ہوئے کہا، “یہ ایک دلچسپ مفروضہ ہے، اس لیے اب ہم بھی ایران سے ان تمام امریکی شہریوں اور متاثرین کے معاوضے کا مطالبہ کر رہے ہیں جنہیں ایران کے بارودی سرنگوں، حملوں اور جنرل قاسم سلیمانی کی زیرِ قیادت کارروائیوں میں ہلاک یا شدید زخمی کیا گیا”۔

امریکی صدر نے مطالبہ کیا کہ اکتوبر 2000ء میں امریکی بحری جہاز ‘یو ایس ایس کول’ (USS Cole) پر ہونے والے بم دھماکے کے متاثرین اور ان کے خاندانوں کو بھی ایران کی طرف سے ہرجانہ ادا کیا جانا چاہیے۔ اس کے علاوہ انہوں نے ایران میں گزشتہ 50 برسوں کے دوران مارے جانے والے پرامن مظاہرین کا ذکر کرتے ہوئے دعویٰ کیا کہ گزشتہ پانچ ماہ کے دوران ہی ایران میں 52 ہزار افراد اپنی جانیں گنوا چکے ہیں، جن کے لواحقین بھی معاوضے کے حقدار ہیں۔

ٹرمپ نے امریکی مذاکراتی ٹیم کو واضح ہدایات دیتے ہوئے اعلان کیا کہ امریکہ کی جانب سے پیش کردہ یہ تمام تلافی اور معاوضے کے مطالبات آئندہ تہران کے ساتھ ہونے والی تمام تر سفارتی گفتگو اور مذاکرات میں باضابطہ اور لازمی طور پر شامل رکھے جائیں گے۔