ایران اور عراق جانے والے پاکستانی زائرین کیلئے سفری ایڈوائزری جاری

وزارتِ مذہبی امور نے ایران اور عراق کا فضائی سفر کرنے والے پاکستانی زائرین اور زیارت گروپ آرگنائزرز (ZGOs) کے لیے اہم سفری ایڈوائزری جاری کر دی ہے۔ ترجمان کے مطابق بالخصوص تہران، مشہد اور نجف جانے والے مسافروں کو ہدایت کی گئی ہے کہ روانگی سے قبل پروازوں کی پیشگی تصدیق لازمی کریں اور غیر یقینی پروازوں سے گریز کریں۔ وزارت نے ہدایت کی ہے کہ پرواز منسوخ ہونے یا تاخیر کی صورت میں متبادل زمینی و ہوائی سفر اور رہائش کے لیے اضافی رقم اپنے ساتھ رکھی جائے۔ رجسٹرڈ گروپ آرگنائزرز کو بھی پابند کیا گیا ہے کہ وہ غیر مصدقہ ایرانی پروازوں پر انحصار نہ کریں اور تمام زائرین کو ایڈوائزری سے مکمل طور پر آگاہ رکھیں تاکہ ان کا سفر محفوظ اور بغیر کسی تعطل کے انجام پا سکے۔