گاڑیوں کی درآمد کا وقفہ 2 سے بڑھا کر 3 سال کردیا گیا، ای سی سی نے منظوری دےدی

اسلام آباد: اقتصادی رابطہ کمیٹی (ای سی سی) نے گاڑیوں کی درآمد کے نئے فریم ورک کی منظوری دے دی، جس کے تحت صرف ٹرانسفر آف ریذیڈنس اور گفٹ اسکیمیں برقرار رہیں گی۔ نئی پالیسی کے مطابق گاڑیوں کی درآمد کا وقفہ 2 سے بڑھا کر 3 سال کر دیا گیا جبکہ درآمد شدہ گاڑیاں ایک سال تک ناقابلِ منتقلی رہیں گی۔ اس کے ساتھ کمرشل سیفٹی اور انوائرمنٹ اسٹینڈرڈز لازمی قرار دیے گئے ہیں۔

وزیر خزانہ محمد اورنگزیب کی زیرصدارت اجلاس میں پیٹرولیم مصنوعات پر او ایم سیز اور ڈیلرز مارجن میں 5 سے 10 فیصد تک اضافہ بھی منظور کیا گیا، جس میں نصف اضافہ فوری اور نصف ڈیجیٹائزیشن سے مشروط ہوگا۔

وزارت خزانہ کے اعلامیے کے مطابق سرکلر ڈیٹ مینجمنٹ پلان 2025-26 کے جائزے کے بعد مالی معاونت کم کرنے کے لیے درمیانی مدت کا پلان تیار کرنے کی ہدایت جاری کی گئی۔ ڈسکوز کی کارکردگی کے اہداف پر عملدرآمد یقینی بنانے کے لیے مانیٹرنگ مکینزم قائم کرنے کا فیصلہ بھی کیا گیا۔

ای سی سی نے کلوروفارم کی درآمد پر پابندی اور رائیکلونیتھین کی درآمد صرف فارما کمپنیوں کے لیے DRAP کے این او سی سے مشروط کر دی۔
مزید برآں، پاکستان ڈیجیٹل اتھارٹی کے لیے 1.28 ارب روپے کی تکنیکی گرانٹ، ہاؤسنگ اینڈ ورکس ڈویژن کے لیے 5 ارب روپے کے اضافی فنڈز اور پاسکو کے اثاثوں و واجبات کے خاتمے کے لیے خصوصی کمپنی کے قیام کی منظوری بھی دے دی گئی۔

اجلاس میں پی آئی اے ہولڈنگ کمپنی کے لیے پنشن اور میڈیکل اخراجات کی مد میں فنڈز کی منظوری بھی شامل رہی۔