تحریک انصاف نے بلاول بھٹو کی پیشکش مسترد کر دی

پاکستان تحریک انصاف (پی ٹی آئی) نے پاکستان پیپلز پارٹی کے چیئرمین بلاول بھٹو زرداری کی مذاکرات کی پیشکش کو باضابطہ طور پر مسترد کر دیا ہے۔

میڈیا پروگرام “دنیا مہر بخاری کے ساتھ” میں گفتگو کرتے ہوئے وزیر اطلاعات خیبر پختونخوا شفیع جان نے طنزاً کہا کہ پیپلز پارٹی جب تک ایک نکاح میں موجود ہے، تب تک اس کا دوسرا نکاح نہیں ہو سکتا۔ انہوں نے واضح کیا کہ پیپلز پارٹی پہلے موجودہ اتحادی حکومت سے باہر نکلے، اس کے بعد ہی پی ٹی آئی کے ساتھ کسی قسم کی بات چیت کا امکان پیدا ہو سکتا ہے۔

سیاسی اتحاد سے متعلق بات کرتے ہوئے شفیع جان نے دعویٰ کیا کہ جمعیت علمائے اسلام (ف) کے سربراہ مولانا فضل الرحمان بہت جلد حکومت کے خلاف تحریک انصاف کے ساتھ سڑکوں پر ہوں گے۔ انہوں نے مزید کہا کہ پی ٹی آئی مولانا فضل الرحمان کے ساتھ ایک تحریری معاہدہ کرنے کی خواہش مند ہے تاکہ مستقبل کا سیاسی سفر مشترکہ اور پائیدار بنیادوں پر آگے بڑھایا جا سکے۔