ایران کیساتھ جنگ، امریکا کو طویل فاصلے تک مار کرنیوالے میزائلوں کی کمی کا سامنا

ایران کے ساتھ گزشتہ پانچ ماہ سے جاری جنگ کے دوران امریکی فوج اپنے جدید اور انتہائی درست نشانہ لگانے والے طویل فاصلے تک مار کرنے والے میزائلوں کا بڑا حصہ استعمال کر چکی ہے، جس سے مستقبل میں دیگر بڑی جنگوں کے لیے امریکی عسکری تیاریوں پر سنگین سوالات اٹھ گئے ہیں۔ رپورٹ کے مطابق ایک ملین ڈالر سے زائد مالیت والے زمین سے زمین پر مار کرنے والے ان جدید میزائلوں کے ذخائر تقریباً ختم ہو چکے ہیں۔ ماہرین کا کہنا ہے کہ فروری میں اسرائیل کے ساتھ مل کر شروع کی گئی اس جنگ کے طول پکڑنے سے پیدا ہونے والی اس کمی کے بعد اگر صدر ڈونلڈ ٹرمپ دوبارہ بڑے حملوں کا فیصلہ کرتے ہیں تو انہیں میزائلوں کے بجائے پائلٹ والی ایئر فورس پر انحصار کرنا پڑے گا۔ دفاعی تجزیہ کاروں نے خبردار کیا ہے کہ اسلحے کی مینوفیکچرنگ کی موجودہ سست رفتار کے باعث اس صورتحال سے روس اور چین جیسے طاقتور حریفوں کے خلاف امریکہ کی عالمی دفاعی صلاحیت شدید متاثر ہو سکتی ہے۔