چین کا صوبہ گانسو میں سیلاب سے تباہی کی ذمہ داری کے تعین کیلئے تحقیقات کا اعلان

چین کے شمال مغربی صوبہ گانسو میں حالیہ موسلا دھار بارشوں کے بعد آنے والے تباہ کن سیلاب کی ذمہ داری کا تعین کرنے کے لیے باقاعدہ تحقیقات کا اعلان کر دیا گیا ہے۔

عالمی میڈیا کی رپورٹس کے مطابق  چین کے قدرتی آفات سے بچاؤ، کمی اور امداد کے قومی کمیشن نے صوبہ گانسو میں سیلاب سے ہونے والے جانی و مالی نقصانات اور غفلت کی تحقیقات کی خود نگرانی کرنے کا فیصلہ کیا ہے۔  26 جولائی کی سہ پہر ڈنگسی شہر کی وی یوان کاؤنٹی کے ایک خوبصورت تفریحی علاقے میں اچانک سیلابی ریلہ آیا تھا، جس کے نتیجے میں 25 افراد ہلاک اور 23 زخمی ہو گئے تھے۔  قومی کمیشن نے صوبہ گانسو کے مقامی حکام پر زور دیا ہے کہ وہ اس قدرتی آفت سے ہونے والے نقصانات کی شفاف تحقیقات کریں اور غفلت کے ذمہ داروں کا جلد از جلد تعین کریں۔

کمیشن نے مزید تاکید کی ہے کہ مقامی انتظامیہ آفات سے بچاؤ، خطرات میں کمی اور امدادی صلاحیتوں میں فوری اضافہ کرے تاکہ آئندہ ایسے واقعات سے محفوظ رہا جا سکے اور شہریوں کے جان و مال کی بہتر تحفظ کو یقینی بنایا جا سکے۔