امریکی صدر ٹرمپ کی مشیروں اور کابینہ اراکین سے ملاقات،ایران کیخلاف بڑےحملوں پرغور

امریکی صدر ڈونلڈ ٹرمپ نے اپنے سینئر مشیروں اور کابینہ کے اراکین کے ساتھ ایک اہم اجلاس میں ایران کے خلاف ممکنہ بڑے فوجی حملوں اور آئندہ کی حکمتِ عملی پر غور شروع کر دیا ہے۔

اس اجلاس سے قبل وائٹ ہاؤس کے اوول آفس میں صحافیوں سے گفتگو کے دوران جب صحافیوں نے صدر ٹرمپ سے پوچھا کہ کیا انہوں نے ایران کے خلاف بڑے فوجی آپریشن سے متعلق کوئی حتمی فیصلہ کر لیا ہے؟ تو صدر ٹرمپ نے جواب دیا، “نہیں، میں نے ابھی تک کوئی حتمی فیصلہ نہیں کیا ہے۔”

امریکی صدر نے ایران کے ساتھ جاری سفارتی صورتحال پر بات کرتے ہوئے کہا کہ ایران مذاکرات کے لیے سنجیدہ نظر آتا ہے لیکن فی الحال ڈیل (معاہدہ) کرنے کے لیے تیار نہیں ہے۔ صدر ٹرمپ کا مزید کہنا تھا، “دیکھیں، اس وقت بھی ہماری ان سے بات چیت کا سلسلہ جاری ہے۔ میرے خیال میں وہ ہر گزرتے دن کے ساتھ زیادہ سنجیدہ ہوتے جا رہے ہیں، اور شاید اس سنجیدگی کی وجہ بھی سب کے سامنے بالکل واضح ہے۔”