فلسطینی ایوان صدر نے اسرائیلی آبادکاروں کی کارروائیوں کو دہشتگردی قرار دیدیا

فلسطینی صدارتی دفتر نے مقبوضہ مغربی کنارے میں اسرائیلی آبادکاروں کی جانب سے کی جانے والی کارروائیوں کی شدید مذمت کرتے ہوئے انہیں کھلی دہشت گردی قرار دیا ہے۔ فلسطینی خبر رساں ادارے ‘وفا’ کے مطابق صدارتی دفتر نے علاقے میں بڑھتی ہوئی کشیدگی اور تشدد کا ذمہ دار براہ راست اسرائیلی حکومت کو ٹھہرایا ہے، جو ان آبادکار گروہوں کو مالی اور سیاسی سرپرستی فراہم کر رہی ہے۔ بیان میں مزید کہا گیا کہ ان تمام تر اقدامات کا اصل مقصد مشرقی یروشلم سمیت مغربی کنارے سے فلسطینیوں کی جبری بے دخلی کے منصوبے پر عمل درآمد کرنا ہے، جبکہ جنگ بندی کے اعلان کے باوجود اسرائیل غزہ کی پٹی میں بھی کارروائیاں جاری رکھے ہوئے ہے۔