قطر کی سعودی بحری جہاز پر حوثی حملے کی شدید مذمت، ریاض سے مکمل یکجہتی کا اعلان

قطر نے بحیرۂ احمر میں سعودی بحری جہاز پر حوثیوں کے حملے کی شدید الفاظ میں مذمت کرتے ہوئے اسے بین الاقوامی جہاز رانی کے قوانین کی سنگین خلاف ورزی قرار دیا ہے۔ قطری وزارتِ خارجہ کی جانب سے جاری کردہ بیان میں کہا گیا ہے کہ اس نوعیت کے حملے عالمی توانائی کے تحفظ کے لیے بڑا خطرہ ہیں اور حوثیوں کے مسلسل اقدامات سے خطے کے امن و استحکام کو شدید نقصان پہنچ رہا ہے۔ قطر نے اقوامِ متحدہ کی سلامتی کونسل کی قراردادوں پر مؤثر عمل درآمد کا مطالبہ کیا ہے۔ ترجمان نے واضح کیا کہ قطر سعودی عرب کی خودمختاری، سلامتی اور استحکام کے تحفظ کے لیے اٹھائے جانے والے ہر اقدام میں اس کے ساتھ کھڑا ہے۔ اس کے علاوہ، قطری وزارتِ خارجہ نے یمن میں امن اور رابطہ کاری کے لیے سلطنتِ عمان کی سفارتی کوششوں کی بھی تعریف کی اور تنازعات کو مذاکرات کے ذریعے حل کرنے پر زور دیا۔