ایرانی وزیر داخلہ کی لاہور آمد، علامہ اقبالؒ کے مزار پر حاضری

ایرانی وزیر داخلہ اسکندر مومنی ایک اعلیٰ سطحی وفد کے ہمراہ لاہور پہنچ گئے، جہاں وفاقی وزیر داخلہ محسن رضا نقوی نے ان کا پرتپاک استقبال کیا۔ دورے کے دوران ایرانی وفد نے شاعرِ مشرق علامہ محمد اقبالؒ کے مزار پر حاضری دی، پھولوں کی چادر چڑھائی اور فاتحہ خوانی کی۔ بعد ازاں وفد نے تاریخی بادشاہی مسجد کا دورہ کیا جہاں سیکرٹری اوقاف ڈاکٹر احسان بھٹہ نے معزز مہمانوں کو مسجد کے تاریخی پس منظر پر بریفنگ دی۔ وفاقی وزیر داخلہ محسن نقوی اور ایرانی ہم منصب نے حضرت بی بی پاک دامنؒ کے مزار پر بھی حاضری دی اور دونوں برادر اسلامی ممالک پاکستان اور ایران کی سلامتی، امن اور خوشحالی کے لیے خصوصی دعائیں مانگیں۔ اس موقع پر ایرانی وفد نے لاہور کے ثقافتی و مذہبی ورثے کو سراہا اور گہری دلچسپی کا اظہار کیا۔