امریکی گرین کارڈ: اگست 2026 کے ویزا بلیٹن میں فیملی ویزا درخواست گزاروں کے لیے بڑی پیش رفت

امریکی محکمہ خارجہ نے اگست 2026 کا ویزا بلیٹن جاری کر دیا ہے، جس میں فیملی کیٹیگری (خاندانی کفالت) کے تحت گرین کارڈ کے منتظر افراد کے لیے اس سال کی سب سے بڑی پیش رفت دیکھنے میں آئی ہے۔

رپورٹ کے مطابق فیملی اسپانسرڈ ویزا کیٹیگریز میں تاریخوں کا کٹ آف نمایاں طور پر آگے بڑھا ہے، جس سے ہزاروں زیرِ التوا درخواست گزاروں کے لیے ویزا پروسیسنگ اور گرین کارڈ کے مراحل جلد مکمل ہونے کی راہ ہموار ہو گئی ہے۔

دوسری جانب، ملازمت یا روزگار کی بنیاد پر (Employment-Based) دیے جانے والے ویزوں میں بہت محدود پیش رفت دیکھی گئی ہے۔ سالانہ طے شدہ ویزا کوٹہ ختم ہونے کے باعث بھارتی شہریوں کے لیے بعض اہم کیٹیگریز فی الوقت بند یا غیر فعال ہیں۔ ماہرین کے مطابق امریکی ویزا کے خواہش مند افراد کے لیے یہ بلیٹن ایک ملا جلا رجحان پیش کرتا ہے، جہاں خاندانی بنیادوں پر درخواست دینے والوں کو بڑی راحت ملی ہے جبکہ پروفیشنلز کے لیے انتظار مزید طویل ہو گیا ہے۔