آبنائے ہرمز میں ایک آئل ٹینکر دھماکے سے تباہ، 2 واپس لوٹ گئے: پاسداران انقلاب

ایران کے پاسدارانِ انقلاب اسلامی (IRGC) نے دعویٰ کیا ہے کہ حکمتِ عملی کے لحاظ سے انتہائی اہم سمندری گزرگاہ آبنائے ہرمز (Strait of Hormuz) میں ایک آئل ٹینکر شدید دھماکے کے بعد تباہ ہو گیا ہے، جبکہ دیگر 2 تیل بردار بحری جہاز خوف کا شکار ہو کر اپنا راستہ بدلنے اور واپس لوٹنے پر مجبور ہو گئے ہیں۔

پاسدارانِ انقلاب کی جانب سے جاری کردہ ایک اہم بیان میں کہا گیا ہے کہ خطے میں تناؤ اور عسکری کارروائیوں کے دوران آبنائے ہرمز سے گزرنے کی کوشش کرنے والے ایک آئل ٹینکر میں اچانک زور دار دھماکہ ہوا جس کے نتیجے میں جہاز کاملاً تباہ ہو گیا۔ واقعے کے فوری بعد علاقے میں موجود دیگر 2 آئل ٹینکرز پیش قدمی سے رک گئے اور حفاظتی تدابیر کے تحت اپنے پرانے راستوں پر واپس چلے گئے۔

یہ واقعہ ایک ایسے وقت میں سامنے آیا ہے جب امریکی سینٹرل کمانڈ (CENTCOM) اور ایرانی فورسز کے درمیان سمندری گزرگاہوں پر تسلط اور سیکیورٹی سے متعلق بیانات اور عسکری جھڑپوں کا سلسلہ تیزی سے جاری ہے۔ ایرانی پاسدارانِ انقلاب کی جانب سے پہلے بھی متنبہ کیا جا چکا ہے کہ بین الاقوامی فورسز یا غیر ملکی جہازوں کی غیر قانونی اور اشتعال انگیز نقل و حرکت کو قطعی برداشت نہیں کیا جائے گا۔