کویت نے آئل ٹینکر پر حملے کے خلاف ایرانی سفیر کو طلب کرلیا

کویت کی وزارتِ خارجہ نے ایرانی سفیر کو وزارت میں طلب کر کے آبنائے ہرمز میں کویتی آئل ٹینکر پر کیے گئے حملے پر شدید احتجاج درج کرایا ہے۔ سوشل میڈیا پر جاری ایک بیان میں کویتی وزارتِ خارجہ نے اس کارروائی کو ریاستِ کویت کی خودمختاری، علاقائی سلامتی اور مفادات کی کھلی خلاف ورزی قرار دیتے ہوئے بین الاقوامی بحری آمدورفت کی آزادی اور عالمی قوانین پر حملہ قرار دیا ہے۔ بیان کے مطابق اس حملے میں ٹینکر کے عملے کے متعدد ارکان زخمی بھی ہوئے ہیں۔ کویت نے واضح کیا ہے کہ وہ اس جارحیت کا جواب دینے اور اپنی سلامتی کے تحفظ کے لیے تمام ضروری اقدامات کرنے کا حق محفوظ رکھتا ہے اور واقعے کی تمام تر ذمہ داری ایران پر عائد کرتا ہے۔