پنجاب کی 5 میڈیکل یونیورسٹیوں میں وائس چانسلر کے اضافی چارجز کا نوٹیفکیشن جاری

گورنر پنجاب نے بطور چانسلر اپنے اختیارات کا استعمال کرتے ہوئے صوبے کی پانچ بڑی میڈیکل یونیورسٹیوں میں وائس چانسلرز کے اضافی چارجز دینے کی منظوری دے دی ہے، جس کے بعد محکمہ سپیشلائزڈ ہیلتھ کیئر اینڈ میڈیکل ایجوکیشن نے باضابطہ نوٹیفکیشنز جاری کر دیے ہیں۔ نوٹیفکیشن کے مطابق کنگ ایڈورڈ میڈیکل یونیورسٹی (KEMU) کا اضافی چارج پروفیسر ڈاکٹر محمد معین کو، فیصل آباد میڈیکل یونیورسٹی (FMU) کا چارج پرنسپل ڈاکٹر محمد فیصل بلال لودھی کو، اور فاطمہ جناح میڈیکل یونیورسٹی کا چارج پروفیسر ڈاکٹر عبدالحمید کو سونپا گیا ہے۔ علاوہ ازیں، پرنسپل راولپنڈی میڈیکل کالج پروفیسر ڈاکٹر محمد خرم کو راولپنڈی میڈیکل یونیورسٹی (RMU) اور پروفیسر ڈاکٹر نادیہ نسیم کو یونیورسٹی آف ہیلتھ سائنسز (UHS) لاہور کے وائس چانسلر کا اضافی چارج تفویض کیا گیا ہے۔ یہ عارضی تقرریاں تین ماہ کی مدت یا مستقل وائس چانسلرز کی تعیناتی تک نافذ العمل رہیں گی۔