ٹرمپ کا لبنان کی بھرپور حمایت کا اعلان، ابراہم معاہدوں میں مزید ممالک کی شمولیت کی پیشگوئی

امریکی صدر ڈونلڈ ٹرمپ نے وائٹ ہاؤس میں لبنان کے صدر جوزف عون سے ملاقات کے بعد میڈیا سے گفتگو کرتے ہوئے مشرقِ وسطیٰ، ایران اور حوثیوں کے حوالے سے اہم بیانات دیے ہیں۔ صدر ٹرمپ نے کہا کہ امریکا لبنان کی بحالی کے لیے بھرپور مدد کرے گا اور اگر لبنانی صدر چاہیں تو وہ حزب اللہ سے بھی بات چیت کے لیے تیار ہیں۔ ایران سے متعلق بات کرتے ہوئے امریکی صدر نے دعویٰ کیا کہ تہران کے ساتھ بیک ڈور سفارتی رابطے جاری ہیں اور ایران کو ایٹمی ہتھیار حاصل کرنے سے روک دیا گیا ہے۔ انہوں نے خبردار کیا کہ اگر ایران نے اپنی جوہری تنصیبات دوبارہ فعال کرنے کی کوشش کی تو امریکا دوبارہ حملہ کرے گا، جبکہ حالیہ نقصانات کے بعد ایران کو تعمیرِ نو میں 20 سے 25 سال لگ سکتے ہیں۔ اس کے علاوہ انہوں نے حوثیوں کے خلاف مزید سخت کارروائی کے عزم کا اعادہ کرتے ہوئے کہا کہ امریکا باب المندب اور آبنائے ہرمز کی صورتحال پر مسلسل نظر رکھے ہوئے ہے۔