پٹرول پمپ اونرز ایسوسی ایشن کا کل سے ملک گیر ہڑتال کا اعلان

آل پاکستان پٹرول پمپ اونرز ایسوسی ایشن نے وفاقی حکومت کے ساتھ مذاکرات ناکام ہونے کے بعد 22 جولائی کی رات 12 بجے سے ملک بھر میں غیر معینہ مدت کے لیے مکمل ہڑتال کا اعلان کر دیا ہے۔ ایسوسی ایشن کے مطابق وفاقی وزیرِ پیٹرولیم کے ساتھ ڈیلرز کے مارجنز میں اضافے اور ڈیلی پرائسنگ کے نفاذ سمیت دیگر مطالبات پر پیش رفت نہ ہو سکی، جس کے باعث مذاکرات بغیر کسی نتیجے کے ختم ہو گئے۔ ایسوسی ایشن نے ملک بھر کے پمپ مالکان کو ہڑتال میں بھرپور شرکت اور اتحاد برقرار رکھنے کی اپیل کرتے ہوئے واضح کیا ہے کہ مطالبات کی منظوری اور حکومت کی جانب سے حتمی فیصلے تک ملک گیر بندش جاری رہے گی۔