آبنائے ہرمز سے امریکی اتحادیوں کی آمدورفت مشکل بنائیں گے، ایرانی فوج کا انتباہ

ایرانی فوج نے شدید خبردار جاری کرتے ہوئے اعلان کیا ہے کہ اب کوئی بھی ملک آبنائے ہرمز کو فوجی سازوسامان کی منتقلی کے لیے استعمال نہیں کر سکے گا۔ ایرانی مسلح افواج کے جاری کردہ بیان کے مطابق بعض ممالک برسوں سے اس تزویراتی (Strategic) بحری گزرگاہ سے فوائد اٹھانے کے باوجود ایران کے دشمنوں کے ساتھ کھڑے ہو گئے ہیں، جس کے بعد اب امریکہ اور اس کے اتحادیوں کو اس راستے سے گزرنے میں شدید مشکلات کا سامنا کرنا پڑے گا۔ ایرانی فوج نے واضح کیا ہے کہ اگر مکمل دفاعی ناکہ بندی نہ کی گئی تو دشمن دوبارہ ایرانی سرزمین کو نشانہ بنا سکتا ہے، اس لیے قومی سلامتی کے تحفظ کے لیے اس عالمی بحری راستے پر سخت ترین اقدامات کیے جائیں گے۔ ماہرین کے مطابق یمن کے حوثیوں کی جانب سے بھی ناکہ بندی کے بعد اس اہم ترین عالمی توانائی گزرگاہ پر کشیدگی سے خام تیل کی عالمی قیمتوں اور بین الاقوامی تجارت پر سنگین اثرات مرتب ہو سکتے ہیں۔