ایرانی فوج کے کویت میں دو امریکی فوجی اڈوں پر ڈرون حملے، اسلحہ ڈپو، ریڈارز تباہ

ایرانی فوج نے باضابطہ اعلان کیا ہے کہ اس نے ‘آپریشن لائٹننگ’ کے 16ویں مرحلے کے تحت کویت میں واقع 2 امریکی فوجی اڈوں کو ڈرونز کے ذریعے نشانہ بنایا ہے۔ ایرانی فوج کی جانب سے جاری کردہ بیان کے مطابق، ان حملوں میں العدیری کیمپ کے ایک اسلحہ ڈپو جبکہ علی السالم ایئر بیس پر نصب پیٹریاٹ ریڈار اور فضائی نگرانی کے ایک اسٹریٹجک ریڈار کو کامیابی سے ہدف بنایا گیا ہے۔ ایرانی حکام کا مؤقف ہے کہ یہ کارروائی ایران کے شہری انفراسٹرکچر پر حالیہ امریکی حملوں کا منہ توڑ جواب ہے۔ تاحال کویتی حکومت، کویتی عسکری حکام یا پینٹاگون کی جانب سے اس معاملے پر کوئی باضابطہ بیان سامنے نہیں آیا۔ دوسری جانب، ایرانی سرکاری میڈیا نے رپورٹ کیا ہے کہ ایران نے شمالی عراق کے کرد علاقے کے دو اہم شہروں اربیل اور سلیمانیہ میں موجود ‘کردستان فریڈم پارٹی’ کے اڈوں پر بھی شدید حملے کیے ہیں، جس کے فوراً بعد امریکی فوج نے اربیل میں اپنے قونصل خانے کے قریب بارود سے بھرا ایک ایرانی ڈرون مار گرانے کا دعویٰ کیا ہے۔