امریکی افواج کو ایران کے جوابی اقدامات سے بچنے کیلئے فوری نکل جانا چاہیے، ابراہیم عزیزی

ایران کی پارلیمنٹ کی قومی سلامتی اور خارجہ پالیسی کمیٹی کے سربراہ ابراہیم عزیزی نے امریکی افواج کو براہ راست خبردار کرتے ہوئے کہا ہے کہ وہ ایران کے ممکنہ جوابی اقدامات سے بچنے کے لیے خطے سے فوری طور پر نکل جائیں۔ سوشل میڈیا پر جاری اپنے ایک بیان میں ابراہیم عزیزی نے امریکی افواج کو مخاطب کیا اور ایران کے سپریم لیڈر آیت اللہ خامنہ ای کی جانب سے دی گئی جوابی کارروائی کی دھمکیوں کا حوالہ دیا۔ انہوں نے مزید لکھا کہ اگر امریکی فوجی واقعی یہ سمجھتے کہ ہمارے دانشمند سپریم لیڈر کے ‘ناقابلِ فراموش سبق’ سے کیا مراد ہے، تو وہ اپنی جانیں بچانے کے لیے ایک لمحہ بھی ضائع کیے بغیر وہاں سے فرار ہونے کی کوشش کرتے۔