غزہ میں اسرائیلی حملے جاری، 3 بچوں سمیت 8 فلسطینی شہید

غزہ کی پٹی پر اسرائیلی قابض فورسز کے بہیمانہ حملوں کا سلسلہ تھم نہ سکا، جہاں گزشتہ 24 گھنٹوں کے دوران ہونے والے تازہ فضائی حملوں میں 3 معصوم بچوں سمیت مزید 8 فلسطینی جامِ شہادت نوش کر گئے ہیں۔ عرب میڈیا کی رپورٹس کے مطابق، اسرائیلی جنگی طیاروں نے غزہ شہر کے گنجان آباد النصر محلے میں ایک رہائشی مکان کو نشانہ بنایا، جس کے نتیجے میں ایک ہی خاندان کے 3 بچوں سمیت 6 فلسطینی شہید اور متعدد شدید زخمی ہو گئے۔ اس حملے کے باعث مکان ملبے کا ڈھیر بن گیا اور آس پاس کی عمارتوں کو بھی شدید نقصان پہنچا۔

عرب میڈیا کا مزید کہنا ہے کہ فضائی بمباری کے ساتھ ساتھ اسرائیلی فوج نے زمینی کارروائیوں کے دوران خان یونس کے غیر قانونی طور پر زیر قبضہ علاقوں میں تباہی مچانے کا سلسلہ بھی جاری رکھا ہوا ہے۔ رپورٹس کے مطابق، اسرائیلی فورسز نے خان یونس کے علاقوں میں دوسری بار رہائشی عمارتوں کو بارود سے مسمار کیا، جہاں اب تک عمارتیں گرانے کی 3 بڑی کارروائیاں کی جا چکی ہیں۔ ان مسلسل حملوں اور مسماری کے اقدامات کے باعث غزہ میں انسانی بحران مزید سنگین صورتحال اختیار کر گیا ہے۔