امریکی فضا آلودہ کرنے پر کینیڈا کو بھاری ٹیرف ادا کرنا ہوگا، صدر ٹرمپ

امریکا اور کینیڈا کے درمیان تعلقات ایک بار پھر شدید کشیدہ ہو گئے ہیں، جہاں امریکی صدر ڈونلڈ ٹرمپ نے کینیڈا کو جنگلاتی آگ کے دھویں کا ذمہ دار ٹھہراتے ہوئے ’آلودگی ٹیرف‘ عائد کرنے کی دھمکی دے دی ہے۔ صدر ٹرمپ کا کہنا ہے کہ کینیڈا کے جنگلات کی آگ سے اٹھنے والا دھواں امریکی فضا کو آلودہ کر رہا ہے، جس سے نمٹنے پر آنے والی ناقابلِ حساب لاگت کینیڈا کی اشیاء پر پہلے سے عائد ٹیرف میں شامل کی جائے گی۔ دوسری جانب کینیڈا کی وزیر برائے ہنگامی حالات ایلینور اولشوسکی نے ان دھمکیوں پر ردِعمل دیتے ہوئے کہا کہ امریکا کو دھمکیوں کے بجائے مدد کرنی چاہیے، کیونکہ کینیڈا نے رواں سال کیلیفورنیا کی آگ پر قابو پانے کے لیے امریکا کی ہنگامی مدد کی تھی۔ کینیڈین حکام کے مطابق حکومت 2020 سے اب تک جنگلاتی آگ کی روک تھام کے لیے 12 ارب کینیڈین ڈالر کی سرمایہ کاری کر چکی ہے۔ ماہرینِ موسمیات کا کہنا ہے کہ بڑھتے ہوئے درجہ حرارت اور ماحولیاتی تبدیلیوں کے باعث کینیڈا کے جنگلات خشک ہو رہے ہیں، جس سے آگ لگنے کے واقعات میں اضافہ ہوا ہے اور مستقبل میں یہ مزید بڑھ سکتے ہیں۔