آپریشن ’’الفارس الشہم 3‘‘: اماراتی طیارہ مزید 100 ٹن امدادی سامان لے کر غزہ پہنچ گیا

مقامی میڈیا کی رپورٹ کے مطابق، متحدہ عرب امارات نے غزہ میں انسانی بحران سے متاثرہ فلسطینی عوام کی فوری ضروریات پوری کرنے کے لیے ایک اور بڑی امدادی پرواز روانہ کر دی ہے۔ یہ امدادی آپریشن ’الفارس الشہم 3‘ کے تحت ہلالِ احمر امارات، اماراتی فلسطینی فرینڈشپ کلب اور دار البر سوسائٹی کے باہمی تعاون سے عمل میں لایا گیا، جس کا مقصد متاثرہ خاندانوں کی مشکلات میں کمی لانا ہے۔ طیارے کے ذریعے بچوں کا دودھ، ادویات اور ضروری ملبوسات روانہ کیے گئے ہیں۔ آپریشن کے کوآرڈینیٹر حمود العفاری نے واضح کیا کہ یو اے ای اپنی قیادت کی ہدایات کے مطابق تمام تر لاجسٹک اور امدادی صلاحیتوں کو بروئے کار لا رہا ہے تاکہ غزہ تک طبی و انسانی امداد کی مسلسل فراہمی کو یقینی بنا کر شہریوں کی بنیادی ضروریات پوری کی جا سکیں، جو کہ انسانی ہمدردی کے لیے ملک کے دیرینہ عزم کا منہ بولتا ثبوت ہے۔