ایرانی حملے میں بجلی اور ڈی سیلینیشن پلانٹ کو نقصان پہنچا: کویت

کویت کی وزارتِ بجلی، پانی و توانائی نے تصدیق کی ہے کہ ایک ایرانی حملے کے نتیجے میں ملک کے ایک اہم بجلی اور ڈی سیلینیشن (پانی صاف کرنے والے) پلانٹ کو شدید نقصان پہنچا ہے، جس کے باعث پلانٹ میں آگ بھڑک اٹھی اور متعدد تنصیبات متاثر ہوئیں۔ حکام کے مطابق، حملے سے بجلی پیدا کرنے والے کئی یونٹس بند ہو گئے، جس کے بعد قومی بجلی کے نظام کو مستحکم رکھنے کے لیے فوری طور پر ہنگامی منصوبہ فعال کر دیا گیا۔ کویت فائر فورس نے بروقت کارروائی کرتے ہوئے آگ پر قابو پا لیا ہے، جبکہ تکنیکی ٹیمیں نقصانات کا جائزہ لینے اور متاثرہ یونٹس کو جلد از جلد بحال کرنے میں مصروف ہیں۔ وزارت نے شہریوں اور رہائشیوں سے اپیل کی ہے کہ وہ موجودہ غیر معمولی صورتحال میں بجلی کا استعمال احتیاط سے کریں تاکہ مرمتی کام کے دوران قومی گرڈ پر دباؤ کم رہے۔ دوسری جانب، مشرقِ وسطیٰ میں کشیدگی مزید بڑھ گئی ہے جہاں امریکی سینٹرل کمانڈ نے دعویٰ کیا ہے کہ ایران پر نئے حملوں کی تقریباً 90 منٹ تک جاری رہنے والی کارروائی مکمل کر لی گئی ہے، جبکہ ایران کی پاسدارانِ انقلاب کا کہنا ہے کہ انہوں نے اپنے فوجیوں کی شہادت کے جواب میں شام میں قائم امریکی اسپیشل آپریشنز کمانڈ سینٹر کو نشانہ بنایا ہے۔