صدر ٹرمپ کا چین پر 2020 کے امریکی صدارتی انتخابات کے ڈیٹا کی سب سے بڑی چوری کا الزام

امریکی صدر ڈونلڈ ٹرمپ نے قوم سے خطاب کرتے ہوئے چین پر انتہائی سنگین الزامات عائد کیے ہیں، جن میں 2020 کے امریکی انتخابات کے ڈیٹا کی تاریخ کی سب سے بڑی چوری کا الزام بھی شامل ہے۔ صدر ٹرمپ کا دعویٰ ہے کہ چینی حکومت نے امریکی ووٹرز کی 22 کروڑ فائلیں حاصل کیں جن میں ووٹرز کے نام، فون نمبرز، سیاسی وابستگی اور دیگر انتہائی حساس معلومات شامل تھیں تاکہ ان کا استعمال غیر قانونی سرگرمیوں کے لیے کیا جا سکے۔ انہوں نے الزام لگایا کہ چین مسلسل امریکی انتخابات میں مداخلت اور الیکشن ڈیٹا ہیک کرنے کی کوششیں کر رہا ہے کیونکہ وہ چاہتا تھا کہ ڈونلڈ ٹرمپ صدارتی الیکشن ہار جائیں۔ صدر ٹرمپ نے ‘ڈیپ اسٹیٹ’ پر بھی تنقید کی اور کہا کہ امریکی اداروں نے ان دستاویزات کو جان بوجھ کر چھپایا، جس کے بعد انہوں نے محکمہ انصاف، ایف بی آئی اور سی آئی اے کو ذمہ داران کے خلاف کارروائی کی ہدایات جاری کر دی ہیں۔ صدر ٹرمپ نے یہ الزام بھی لگایا کہ چین امریکی صحافیوں کو بھاری رقوم کے ذریعے اپنے خلاف منفی مہم چلانے کے لیے تیار کرنا چاہتا تھا، جبکہ انہوں نے خبردار کیا کہ امریکی الیکٹرانک ووٹنگ سسٹم تاحال کمزور اور ہیکنگ کے خطرے سے دوچار ہے۔

چین کے ساتھ ساتھ صدر ٹرمپ نے اپنے خطاب میں خارجہ پالیسی کے دیگر امور پر بھی روشنی ڈالی۔ انہوں نے امریکی فوج کو دنیا کی سب سے طاقتور ترین فوج قرار دیتے ہوئے دعویٰ کیا کہ امریکہ کو ایران کے معاملے میں “بڑی کامیابی” حاصل ہو رہی ہے اور دنیا بہت جلد اس کا نتیجہ دیکھے گی۔ اس کے علاوہ انہوں نے وینزویلا پر 3 جنوری کو کی جانے والی امریکی فوجی کارروائی کا حوالہ دیتے ہوئے کہا کہ امریکہ وینزویلا میں بھی کامیاب رہا، جو اب امریکی اتحاد کے ساتھ مل کر لاکھوں بیرل تیل پیدا کر رہا ہے۔