امریکی نائب صدر نے اسرائیل پر بڑا الزام لگا دیا

امریکی نائب صدر جے ڈی وینس نے واشنگٹن کے سب سے قریبی اتحادیوں میں سے ایک، اسرائیل پر غیر معمولی اور کڑی نکتہ چینی کرتے ہوئے الزام عائد کیا ہے کہ اسرائیلی حکومت کے کچھ ارکان ایران کے ساتھ جنگ کے خاتمے کے معاہدے کی مخالفت اور اسے سبوتاژ کرنے کے لیے امریکی رائے عامہ کو متاثر کرنے کی کوشش کر رہے ہیں۔ مشہور امریکی پوڈ کاسٹر جو روگن کو دیے گئے ایک انٹرویو کے دوران جے ڈی وینس نے گزشتہ ماہ ایران کے ساتھ طے پانے والے سفارتی معاہدے کا بھرپور دفاع کیا۔ انہوں نے دعویٰ کیا کہ وہ یہ بات یقین سے جانتے ہیں کہ اسرائیلی حکومت کے اندر کچھ عناصر امریکی پالیسی کو سفارت کاری سے دور دھکیلنا چاہتے ہیں تاکہ فوجی مہم جوئی کا سلسلہ جاری رکھا جا سکے۔

جے ڈی وینس نے انکشاف کیا کہ ان اسرائیلی عناصر نے امریکہ میں ایک باقاعدہ مہم چلائی جس پر بھاری سرمایہ خرچ کیا گیا۔ انہوں نے مزید کہا کہ بدنامِ زمانہ جیفری ایپسٹین کے اسرائیلی انٹیلی جنس کے ساتھ رابطے ایک حقیقت ہیں، تاہم انہوں نے واضح کیا کہ صدر ٹرمپ کسی بھی قسم کے بلیک میل کا شکار نہیں ہو رہے۔ امریکی نائب صدر نے ایران کے ساتھ تنازع کے حل پر واشنگٹن کے پختہ عزم کا اعادہ کرتے ہوئے کہا کہ ایران میں امریکی زمینی فوج نہیں اتاری جائے گی، کیونکہ اس تنازع کا واحد اور حتمی حل فوجی کارروائی نہیں بلکہ سفارت کاری ہے۔