اہواز، بوشہر سمیت ایران کے مختلف شہروں میں دھماکوں کی آوازیں سنی گئیں، ایرانی میڈیا

ایرانی سرکاری خبر رساں ایجنسی ‘ارنا’ اور مقامی میڈیا کے مطابق ایران کے جنوبی شہروں اہواز اور بوشہر کے مختلف علاقوں میں شدید دھماکوں کی آوازیں سنی گئی ہیں۔ امریکی لڑاکا طیاروں نے ایران کے شہر ‘ایران شہر’ کے ایئرپورٹ پر میزائل حملہ کیا ہے، جبکہ بندر خمیر کے علاقے میں ایک اہم ترین پل کو بھی نشانہ بنایا گیا ہے؛ یہ پل بندر عباس اور لار کے درمیان آمد و رفت کا ایک اہم مواصلاتی راستہ ہے۔

ادھر جنوبی ایران کے اہم شہر بندر عباس میں ایک پہاڑی پر قائم مواصلاتی ٹاور پر بمباری کی گئی، جس کے نتیجے میں پورے علاقے میں بجلی کی فراہمی شدید متاثر ہوئی ہے۔ بندر عباس کے ہی ایک رہائشی علاقے پر ہونے والے امریکی حملے کے نتیجے میں کم از کم 7 افراد کے زخمی ہونے کی بھی اطلاعات ملی ہیں۔ واضح رہے کہ یہ کارروائیاں امریکی سینٹرل کمانڈ (سینٹ کام) کے اس اعلان کے فوراً بعد سامنے آئی ہیں جس میں کہا گیا تھا کہ امریکی فوج نے ایرانی فوجی صلاحیت کو مزید کمزور کرنے کے لیے حملوں کی ایک نئی لہر کا آغاز کر دیا ہے۔