ایران نے امریکا کے حملوں کے باوجود امریکی خاتون رہا کر دی، ٹرمپ کا خیرمقدم

امریکی صدر ڈونلڈ ٹرمپ نے انکشاف کیا ہے کہ ایران نے گزشتہ طویل عرصے سے ملک چھوڑنے سے روکی گئی ایک امریکی خاتون کو بالاآخر وطن واپسی کی اجازت دے دی ہے۔ سماجی رابطے کی ویب سائٹ پر جاری اپنے ایک بیان میں صدر ٹرمپ نے بتایا کہ مذکورہ خاتون کو بائیڈن انتظامیہ کے دورِ حکومت میں سال 2024 میں غلط طور پر حراست میں لیا گیا تھا؛ انہوں نے اس فیصلے پر تہران کے خیر سگالی کے اقدام کو سراہا۔ دوسری جانب، انسانی حقوق کے معروف وکیل جیرڈ جینسر نے رہا ہونے والی امریکی شہری کی شناخت “ڈینا کراری” کے نام سے کی ہے، جنہیں دسمبر 2024 سے ایران سے باہر جانے سے زبردستی روکا جا رہا تھا۔ جیرڈ جینسر نے سماجی پلیٹ فارم ایکس (ٹویٹر) پر تصدیق کی کہ ڈینا اب مکمل طور پر محفوظ ہیں اور اپنے وطن امریکا کے لیے روانہ ہو چکی ہیں، انہوں نے اس دیرینہ مسئلے کو حل کرانے اور ڈینا کی رہائی ممکن بنانے پر صدر ڈونلڈ ٹرمپ کی خصوصی کوششوں کا شکریہ بھی ادا کیا۔