اسرائیل امریکا میں عوامی رائے کی جنگ ہار رہا ہے، جے ڈی وینس

امریکی نائب صدر جے ڈی وینس نے ایک سنسنی خیز انکشاف کرتے ہوئے کہا ہے کہ اسرائیل اس وقت امریکا کے اندر عوامی رائے عامہ (پبلک اوپینین) کی جنگ ہار رہا ہے۔ مشہور امریکی پوڈ کاسٹر جو روگن کو دیے گئے ایک انٹرویو میں نائب صدر جے ڈی وینس نے کھل کر بات کرتے ہوئے تسلیم کیا کہ اگرچہ اسرائیل امریکا کا ایک قریبی اور اہم ترین اتحادی ملک ہے، تاہم وہ امریکی سیاست اور پالیسیوں پر اپنے حق میں اثر انداز ہونے کی مسلسل کوششیں کرتا ہے۔

جے ڈی وینس نے اسٹریٹجک لابی پر تبصرہ کرتے ہوئے کہا کہ اسرائیل سیاسی اثر و رسوخ قائم کرنے کے اس معاملے میں دنیا کے دیگر زیادہ تر ممالک کے مقابلے میں کہیں زیادہ منظم اور مؤثر ثابت ہوا ہے۔ تاہم، انہوں نے واضح کیا کہ اس تمام اثر و رسوخ کے باوجود حالیہ حالات کے تناظر میں اسرائیل کو امریکی عوام کی ہمدردیاں اور حمایت حاصل کرنے میں شدید مشکلات کا سامنا ہے اور وہ اس محاذ پر بتدریج ناکام ہو رہا ہے۔ جے ڈی وینس کے اس اہم ترین بیان کو مشرقِ وسطیٰ کی بدلتی صورتحال اور امریکی عوام بالخصوص نوجوان نسل میں اسرائیل کی خارجہ پالیسی کے خلاف بڑھتی ہوئی ناپسندیدگی کے تناظر میں انتہائی اہمیت کا حامل قرار دیا جا رہا ہے۔