خلیج سے تیل، گیس و دیگر مصنوعات کی ترسیل میں امریکی فوج کا کردار اہم ہے: کرس رائٹ

امریکہ کے وزیر توانائی کرس رائٹ نے واضح کیا ہے کہ خلیج عرب سے تیل، گیس اور دیگر توانائی مصنوعات کی بلا تعطل ترسیل کو محفوظ بنانے کے لیے امریکی فوج انتہائی اہم ترین کردار ادا کر رہی ہے۔ امریکی نشریاتی ادارے “سی این بی سی” کو دیے گئے اپنے ایک خصوصی انٹرویو میں کرس رائٹ نے زور دے کر کہا کہ ایران کے ساتھ جاری کشیدگی کی صورتحال خواہ کچھ بھی ہو، ہمیں ہر صورت یہ یقینی بنانا ہوگا کہ خلیج عرب کے اس اہم ترین تجارتی راستے سے توانائی کی مصنوعات کی عالمی سپلائی جاری رہے۔ ان کا مزید کہنا تھا کہ امریکی فوج اس وقت یہ اہم ذمہ داری بخوبی انجام دے رہی ہے، اور جیسے جیسے خطے میں امریکی فوج کی سرگرمیوں میں اضافہ ہو رہا ہے اور ایران کی عسکری صلاحیتوں کو کمزور کیا جا رہا ہے، توانائی کی سپلائی لائن کو محفوظ بنانے کی یہ کوششیں مزید بہتر اور مؤثر ہوتی جائیں گی۔