امریکا-ایران کشیدگی، امارات میں تمام امریکی قونصلرز کی تقرری منسوخ

متحدہ عرب امارات (یو اے ای) میں متعین امریکی سفارت خانے نے خلیجی خطے میں بگڑتی ہوئی سیکیورٹی صورتحال اور بڑھتے ہوئے خدشات کے پیشِ نظر ابوظہبی میں قائم سفارت خانے اور دبئی میں واقع امریکی قونصل خانے کی تمام معمول کی قونصلر اپائنٹمنٹس 13 سے 15 جولائی تک منسوخ کر دی ہیں۔ امریکی مشن کی جانب سے جاری کردہ ہنگامی سیکیورٹی الرٹ میں درخواست گزاروں کو ہدایت کی گئی ہے کہ وہ ان تاریخوں میں سفارت خانے یا قونصل خانے کا رخ نہ کریں، متاثرہ افراد کو نئی تاریخوں کی فراہمی کے لیے امریکی حکام خود ان سے رابطہ کریں گے۔ اگرچہ سیکیورٹی الرٹ میں کسی مخصوص خطرے یا واقعے کی تفصیلات ظاہر نہیں کی گئیں، تاہم سفارت خانے نے اس منسوخی کی بنیادی وجہ “علاقائی سیکیورٹی صورتحال” کو قرار دیا ہے۔ اس موقع پر امریکی حکام نے اپنے شہریوں کو مقامی میڈیا اور سفارت خانے کی تازہ ترین ہدایات پر نظر رکھنے اور غیر ضروری سفر سے گریز کرنے کی ہدایت کی ہے، جبکہ قونصلر خدمات کی مکمل بحالی کے لیے تاحال کوئی حتمی تاریخ نہیں دی گئی۔