پاسداران انقلاب نے کویت، بحرین اور اردن میں امریکی اڈوں پر میزائل داغ دیئے

ایران نے ‘آنکھ کے بدلے آنکھ’ آپریشن کے تیسرے مرحلے کے تحت خطے میں اپنے دشمنوں کے خلاف ایک بڑی فوجی کارروائی کا اعلان کیا ہے، جس میں اردن، کویت اور بحرین میں واقع فوجی اڈوں کو میزائلوں اور ڈرونز کے ذریعے نشانہ بنایا گیا ہے۔ ایرانی پاسدارانِ انقلاب کے مطابق، یہ حملے ان کے ساحلی اڈوں پر ہونے والے امریکی حملوں کا جواب ہیں۔ ایرانی میڈیا کا دعویٰ ہے کہ اردن کے شہزادہ حسن ایئر بیس پر ایندھن کے ٹینک اور اسلحہ ڈپو تباہ کر دیے گئے ہیں، جبکہ بحرین کے شیخ عیسیٰ ایئر بیس پر امریکی ڈرون کمانڈ سینٹر اور ہینگرز کو نشانہ بنایا گیا۔ کویت کے علی السالم اور احمد الجابر ایئربیسز پر بھی شدید حملے کیے گئے ہیں، جن کے نتیجے میں پیٹریاٹ فضائی دفاعی نظام اور اسٹریٹجک ریڈار سسٹم تباہ ہونے کی اطلاعات ہیں۔ کویتی فوج نے تصدیق کی ہے کہ فضائی دفاعی نظام دشمن کے اہداف کو ناکام بنانے کے لیے متحرک ہے، جبکہ بحرین میں عوام کو محتاط رہنے کی ہدایات جاری کی گئی ہیں۔ دریں اثنا، پاسدارانِ انقلاب نے آبنائے ہرمز میں دو جہازوں کو بھی نشانہ بنانے کا دعویٰ کرتے ہوئے خبردار کیا ہے کہ وہ خطے میں کسی بھی غیر ملکی فوجی مداخلت کو مزید برداشت نہیں کریں گے۔