بہار میں مسلمان خاتون کی تذلیل، ہندو انتہاپسندوں نے زبردستی سندور لگا دیا

بھارت میں مودی حکومت کی سرپرستی میں اقلیتوں بالخصوص مسلمانوں کے خلاف بڑھتے ہوئے مظالم کا ایک اور افسوسناک واقعہ سامنے آیا ہے۔ بھارتی ریاست بہار کے ضلع نواڈا کے علاقے کمل پور میں ہندو انتہا پسندوں نے ایک مسلمان خاتون کو سرعام بدترین تذلیل کا نشانہ بنایا۔

بھارتی جریدے ‘دی ہندوستان گزٹ’ کے مطابق، آر ایس ایس اور بی جے پی کے حامی انتہا پسندوں نے مسلم خاتون کو زبردستی روکا اور مخالفت کے باوجود ان کا برقع کھینچ کر نقاب اتارنے پر مجبور کیا۔ ہجوم نے ناصرف خاتون سے برقع اتروایا بلکہ ان کی پیشانی پر زبردستی ہندو مذہبی علامت ‘سندور’ لگایا اور اس دوران ‘بجرنگ بلی’ کے نعرے بھی لگائے۔ متاثرہ خاتون نے وہاں سے اسکوٹر پر نکلنے کی کوشش کی لیکن جنونی ہجوم ویڈیو بناتے ہوئے ان کا تعاقب کرتا رہا اور کہتا رہا کہ “یہ ویڈیو ہر حال میں بنے گی”۔

واضح رہے کہ بہار میں اس طرح کا یہ پہلا واقعہ نہیں ہے، گزشتہ برس دسمبر میں بہار کے وزیر اعلیٰ نتیش کمار نے بھی ایک سرکاری تقریب کے دوران ایک مسلمان خاتون ڈاکٹر کا نقاب کھینچا تھا۔

انسانی حقوق کے بین الاقوامی ادارے ‘ہیومن رائٹس واچ’ کے مطابق، مودی حکومت کی انتخابی مہم کے دوران مسلمانوں اور دیگر اقلیتوں کے خلاف دیے گئے نفرت انگیز بیانات نے ملک میں امتیازی سلوک اور تشدد کی آگ کو مزید ہوا دی ہے۔ انتہا پسند مودی راج میں مسلمانوں کے لیے جان، مال اور عزت کا تحفظ انتہائی مشکل ہو چکا ہے، جس سے بھارت کے نام نہاد سیکولر ازم کے دعوؤں کی قلعی کھل گئی ہے۔