او آئی سی نے بحری جہازوں پر ایرانی حملوں کو عالمی قانون کی خلاف ورزی قرار دے دیا

اسلامی تعاون تنظیم (او آئی سی) نے بحری جہازوں پر ہونے والے ایرانی حملوں کی شدید الفاظ میں مذمت کرتے ہوئے انہیں عالمی قوانین کی صریح خلاف ورزی قرار دے دیا ہے۔

او آئی سی سیکرٹریٹ کی جانب سے جاری کردہ ایک باضابطہ بیان میں کہا گیا ہے کہ بین الاقوامی تجارتی راستوں پر حملے کرنا اور عالمی تجارت میں رکاوٹیں کھڑی کرنا بین الاقوامی قوانین کے یکسر منافی ہے۔ تنظیم نے واضح کیا کہ تجارتی بحری جہازوں پر ایرانی حملے براہِ راست اقوامِ متحدہ (UN) کے چارٹر کی خلاف ورزی کے زمرے میں آتے ہیں، جس کی عالمی برادری میں کسی صورت اجازت نہیں دی جا سکتی۔

اسلامی تعاون تنظیم نے اپنے بیان میں مزید کہا کہ کویت، بحرین، متحدہ عرب امارات (یو اے ای)، قطر، عمان اور اردن جیسے برادر مسلم ممالک پر ایرانی حملے ان ریاستوں کی خودمختاری، سالمیت اور آزادی پر حملہ ہیں۔ او آئی سی نے خطے میں بڑھتی ہوئی اس کشیدگی پر گہری تشویش کا اظہار کرتے ہوئے تمام فریقین پر زور دیا ہے کہ وہ خطے کے امن کو داؤ پر لگانے والے اقدامات سے گریز کریں