عباس عراقچی سے نمائندہ اقوام متحدہ کی ملاقات، مشرق وسطیٰ کی صورتحال پر گفتگو

اقوامِ متحدہ (UN) کے خصوصی نمائندے ژان آرنو نے ایرانی وزیرِ خارجہ عباس عراقچی سے ایک اہم ملاقات کی ہے، جس میں مشرقِ وسطیٰ کی موجودہ سنگین صورتحال اور علاقائی امن و امان کے حوالے سے تفصیلی تبادلہ خیال کیا گیا۔

خبر ایجنسی کے مطابق، ملاقات کے دوران یو این نمائندے ژاں آرنو نے مشرقِ وسطیٰ میں امن و استحکام کی بحالی کے لیے سفارتی کوششوں کو فوری طور پر تیز کرنے کا مطالبہ کیا۔ دوسری جانب، ایرانی وزیرِ خارجہ عباس عراقچی نے امریکہ کو کڑی تنقید کا نشانہ بناتے ہوئے واشنگٹن پر ایران مخالف اقدامات اور بین الاقوامی معاہدوں کی مسلسل خلاف ورزی کا سنگین الزام عائد کیا۔

عباس عراقچی نے اقوامِ متحدہ کے نمائندے سے مطالبہ کیا کہ عالمی ادارہ امریکہ کے ان غیر قانونی اقدامات کے خلاف ایک واضح اور مضبوط مؤقف اختیار کرے۔ انہوں نے لبنان کی خودمختاری اور علاقائی سالمیت کے لیے ایران کی غیر متزلزل حمایت کا اعادہ کرتے ہوئے، لبنان میں جاری اسرائیلی فوجی کارروائیوں کو فوری بند کرنے کا مطالبہ کیا۔ ایرانی وزیرِ خارجہ نے زور دے کر کہا کہ عالمی برادری کو خطے میں اسرائیلی جارحیت اور قبضے کے خاتمے کے لیے اپنا اثر و رسوخ استعمال کرتے ہوئے کلیدی کردار ادا کرنا چاہیے۔